اهل‌بیتون غرق اولور دریاده ای مشکل‌گشا
زینبون مشکلده دور گل داده ای مشکل‌گشا
🌹🌹
مشکلاتی حل ائدن سن یا علی‌المرتضی
چوخ چتین وقتیمدی محتاج مددکارم بابا
دوشمیشم بیر انقلاب اعظمه من بینوا
قالمیشام آواره بو صحراده ای مشکل‌گشا
🌹🌹
قوم و قارداشیم یاتوب میداندا بیلمم نیلیوم
دستگیرم  پنجه‌ی عدواندا بیلمم نیلیوم
مبتلایم   درده بی  درماندا بیلمم نیلیوم
بیر نفر یوخدور گلن امداده ای مشکل‌گشا
🌹🌹
بیر طرف مشغول غارتدور گروه نا خلف
قورخوشور خوردا بالالار شور و وحشت بیر طرف
گل نجفدن کربلایه یاتما ای شاه نجف
بو کمکسیز عترتون سال یاده ای مشکل‌گشا
🌹🌹
اودلانان قلبیم کیمی خیمه سرا اودلاندی گل
دود آهیم تک هوایه توسدوسی قوزاندی گل
خیمه‌ده ناخوش بالام قالدی اود ایچره یاندی گل
قویما یانسون آتش بلواده ای مشکل‌گشا
🌹🌹
دشت و صحرایه داغیلمیش دامنی سوزانلاریم
هانسی‌سمته یوز قویوم هانسین هایاندان آختاریم
یا که هانسی ظالمه قمچی ووراندا یالواریم
یا کیمه تسکین وئروم اثناده ای مشکل‌گشا
🌹🌹
بیر بولوک عورت اوشاقه من پرستارم بوگون
هئچ خیاله گلمین ظلمه گرفتارم بوگون
هر بلا گلسه قبولیمدور خریدارم بوگون
صبر سرمایمدی بو سوداده ای مشکل‌گشا
🌹🌹
هر غمیم‌بیر یان حسینون محنتی تک بیر یانا
ذبح‌اولوب باشی دوشوب نعشی مشبک بیر یانا
گون قباقینده قالوب گل نعشنی چک بیر یانا
یاره‌سی چوخدور اونون اعضاده ای مشکل‌گشا
🌹🌹
آز قالور قرخ ایل اولا ای سید والاتبار
درگه پاکونده اولموش(یحیوی)خدمتگذار
صاحبان جاهه بو منصبله ایلر افتخار
سربلند ائتمیش آدوز دنیاده ای مشکل‌گشا
🌹🌹
تاج الشعرا
🌹مرحوم استاد یحیوی اردبیلی🌹