قارداشون یخوبلا قولسوز ای شه زمن یارالی
باش یارالی گوز یارالی یوز یارا بدن یارالی

بسکه بد نظر توخوندی هاشمی قمر جماله
ووردی چشم زخم الیندن قانلی توپراقیله هاله
قورخورام دیم او بدرون دوندی ایشگه بیر هلاله
آز قالور جداده گورسون هر گیدن گلن یارالی

من غلام خانه زادم نوکرم سنه وفالی
سندن اخذ ایدوب ابوالفضل هر فضیلت و کمالی
محضرونده خدمتیمده اولمیوب قصور اولالی
تک بو گون اولوب که دوشدوم اقتداریدن یارالی

سیّدی سنه بُلورسن من صدیق جان نثارم
آستان عزّتونده بیر ذلیل خاکسارم
بیر قصور خدمت اوسته سرفکنده شرمسارم
روی خجلتیم یر اوسته سورتولوب گیدن یارالی

مندن اینجیمه که یتموب خدمتیم بو چولده باشه
چنگ ووردوم ال چاتونجا ذیل و همّت و تلاشه
آخِر اللریم کسیلدی کشمکش دایاندی باشه
وار هنوز او کشمکشلر باشیم اوسته من یارالی
من او شیریدیم که مین لر شیر شرزه لر شکاریم
دشمنین بیلین قراردی قانلی پنجه دن فشاریم
ایمدی پنجه سی کسیلموش شیره دوندی روزگاریم
دسته ی شغال الینده دست و پنجه دن یارالی

قان آخور یارالاریمدان هر نفس نفس آلاندا
خاصّه باشیمی کسنلر زحمته منی سالاندا
روحیم ایستوری که اوچسون حالدن حالا قالاندا
پیکریمده تاپماز امّا روزن اولمین یارالی

من یارالیه غریبه قان اگرچه داغ داش آغلار
پیکریمده گوز گوز اولموش یاره لرده قارداش آغلار
اوز گوزوم ولی سنون بو نسگلونده قانیاش آغلار
سن بیلی بوکولموش اولدون من بیلی بوکن یارالی

بیر سو صحبتی اولوندی تلّی من آشان زماندا
گوزلیم سو اوسته قالدی گوزده سو داشان زماندا
برق تیغیمیله دریا لشکره جوشان زماندا
بو شرارده دردیم اولدی سوزی سونمین یارالی

اسدی صرصر مخالف قوپدی بیر مهیب طوفان
قورخودان قاچان الیندن تنگ اولوب وسیع میدان
خطّ سیرینی ایتوردی گویده هر خدنگ پرّان
یول آزان خدنگلردن اولدی چوخ دوشن یارالی
بیر قیامت اولدی سالماز مثلینی زمانه یاده
بیر بیرین قاچور ایاخلور چه سواره چه پیاده
چوخلارین بو چولده گیتدی خرمن حیاتی باده
چوخلاری یخلدی یرده شیون ایلین یارالی

من او گیر و دار ایچینده فوراً آت بیلینده یاتدیم
کیپریگیم کیمی دوزولموش اوخلاری گوزومدن آتدیم
آت سالوب سو اوسته بیر باش یول آچوب فراته چاتدیم
من سویوندوم ایتدی دشمن قلبیمی محن یارالی

من فراتدن چخاندا خیمیه ساری شتابان
اوخ آتانلارا او ساعت سعدین اوغلی ویردی فرمان
ایلیون بو هاشمینی ای گروه تیر باران
اوخلیون بو شاهبازی دوشدون اوخ یین یارالی
دوتدی بیر قرا بولود تک اوخ فضای کارزاری
چالدی اودلی اِلدیریملار هر خدنگ جانشکاری
یاغدی چوخلی قان یاغشلار، قانلی سیل لر اولدی جاری
ایلدی منی او سیل لر سرو ریشه کن یارالی

موج ووردی قانلی سیل لر که منی خوب آپارسون
داغ کیمی دایاندیقیمدان ریشه می قازوب قوپارسون
آتدیم اللریمی بلکه غرقه دن منی قوتارسون
اللریمده گیتدی اولدوم قان آرا اوزَن یارالی

قول بوداق لاری وورولموش دوشدی سرو بوستانین
گللریم سارالدی سولدی، گیتدی ذوقی گلستانین
هانسی گلدی گوگلون آلسون دلشکسته باغبانین
دلدن اولدی لاله داغلی یاس و یاسمن یارالی

سیّدی دیولّه هر کیم بسلیه سنه ارادت
جان ویرن زمانی ایلر گل جمالیوی زیارت
لطف قیل منیمده اولسون قسمتیمده بو سعادت
بو قتیل کویون اولسون عارضون گورن یارالی

من دیمم بو کمترینه لطفیوی زیادت ایله
لیک من غلامه شانون قدریجه عنایت ایله
گیتدیم الدن اولسا ممکن گَل منی عیادت ایله
قبله سینی گورسون اُلسون صاق صولا دونن یارالی

هر نفسده مرغ روحیم واردی اوچماقا هوسده
منده ایلرم تامّل بیر دقیقه هر نفسده
ایستورم بیر آز یوبانسون روحیمون قوشی قفسده
روحینی باش اوسته گورسون بیرده جان ویرن یارالی

سن بُلورسن انتظارین دردی چوخ یاماندی قارداش
اُلدوم انتظار الیندن دورموری گوزومده قانیاش
قورخورام که سن گَلینجه آیریلا گیده سنان باش
من اُلم دیسونله اُلدی حسرتون چکن یارالی

لطفون اولسا ایله سن گر سرفراز عیادتیمدن
هیچ یره منی آپارما مصرع شهادتیمدن
قوی یوزوم قوری یر اوسته من اُلوم خجالتیمدن
اِللریم دیسونله ایللر وای خجل اُلن یارالی

گورسن اوخلی گوز قان آغلار آغلادان منی او اوخدی
نه بو یاره لردی کاری که ستاره دنده چوخدی
اوخلی مشکیده سو یوخدی آغلادان منی او یوخدی
مشکی اوخلاناندا سقّا اوخشار آغلین یارالی

غم یمه که بیرقون من ساخلیانمادیم سرافراز
قانلی پرچمیم اُلمده قبریده یاتامدا یاتماز
ضامنم اوزوم که بیر دم اهتزازدن دایانماز
حشر اولونجا قبریم اوسته گورسنر اسن یارالی

نوفل ایلین ستمدن عرشه ظلملر دایاندی
ایسّی قان سپیلدی باشدان دشمنیم آلشدی یاندی
پرچمیم باشمدان اُپدی قرمزی قانا بویاندی
پرچمیمده منده اولدوخ القان آغلین یارالی

بس او یارم اولدی کاری رختی صبریمین سویولدی
ال هانی باشا قویِیدیم اورگیم باشی اویولدی
گَلدی مرتضی نجفدن باشیمه الی قویولدی
دیدی یوز یوزه قویاق گَل من یارالی سن یارالی